Raporti Vjetor 2024

Të nderuar anëtarë të Asamblesë,

Katër vitet e fundit kanë qenë ndër më sfiduesit në historinë e Institutit tonë. Kam zgjedhur të jem i hapur, sepse e vërteta i shërben më shumë të ardhmes sonë se çdo raport me fjalë të bukura. Kemi kaluar periudha me çështje ligjore të ndërlikuara, me mungesë të vullnetit për bashkëpunim brenda Këshillit Drejtues dhe me tensione që shpesh na kanë penguar të ecim me ritmin që anëtarët meritojnë.

Këto vështirësi nuk e kanë zbehur detyrimin tim për të ruajtur integritetin e Institutit dhe për ta mbajtur atë funksional, por më kanë mësuar diçka thelbësore: asnjë nismë, sado e mirë, nuk mbijeton pa besim dhe bashkëpunim.

Pas një muaji, ju do të zgjidhni Këshillin e ri Drejtues. Ju ftoj të zgjidhni individë që sjellin energji pozitive, që dinë të dëgjojnë dhe që e vendosin interesin e profesionit mbi çdo interes personal. Le të mbyllim një kapitull të vështirë dhe të hapim një tjetër, ku fjala “bashkë” nuk mbetet vetëm në statut, por kthehet në mënyrë veprimi.

Me respekt, Berti Pashko.

Të nderuar anëtarë,

Viti 2024 ka qenë një vit pune të ngjeshur për strukturën ekzekutive të Institutit. Qëllimi ynë ka qenë i qartë: të mbështesim Këshillin Drejtues dhe të sigurojmë funksionimin e përditshëm të IEKA-s me korrektësi dhe transparencë.

Stafi ynë ka menaxhuar me kujdes proceset e edukimit të vijueshëm profesional, regjistrimet e reja të audituesve ligjorë dhe administrimin e shërbimeve për anëtarët. Janë zhvilluar të gjitha sesionet e planifikuara të kualifikimit, janë përditësuar regjistrat publikë dhe janë përmbushur kërkesat ligjore për raportim e kontroll të cilësisë.

Në fushën financiare kemi arritur të ruajmë ritmin e të ardhurave, duke tejkaluar buxhetin e miratuar, por kemi hasur edhe sfida: arkëtimet e kuotave të prapambetura, rritja e shpenzimeve të paparashikuara dhe efekti i tarifës së Bordit të Mbikëqyrjes Publike. Përpara nesh janë sfida të reja: forcimi i disiplinës financiare, modernizimi i proceseve dhe rritja e efikasitetit në shërbim të anëtarëve.

Me respekt, Doranin Agalliu.